ИИМ: Мыйзамсыз миграция уюштуруунун 49 фактысы аныкталды

20

Ички иштер органдарынын кызматкерлери тарабынан жүргүзүлгөн “Нелегал” ыкчам-профилактык иш-чарасын жүргүзүүнүн алкагында мыйзамсыз миграция уюштуруунун 49 фактысы аныкталды. Бул тууралуу ИИМдин басма сөз кызматы билдирди.

Мыйзамдуулукту камсыздоо, коомдук тартипти коргоо жана кылмыштуулукка каршы күрөшүү, мыйзамсыз миграциянын алдын алуу боюнча иш-чараларды жүзөгө ашыруу максатында, 2021-жылдын 10-мартынан 12-мартына чейин республиканын аймактык ички иштер органдарынын кызматкерлери тарабынан “Нелегал” аталышындагы ыкчам-профилактикалык иш-чаралар жүргүзүлдү.

Иш-чаранын жүрүшүндө ИИОнун аймактык бөлүмдөрү тарабынан бир катар мыйзам бузуулар, атап айтканда мыйзамсыз миграция уюштуруунун 49 фактысы аныкталып, кылмыштардын жана жоруктардын бирдиктүү реестрине (КЖБР) КРнын Жоруктар жөнүндө кодексинин 122-беренеси менен катталган.

Ошондой эле, Кыргызстанда чет өлкөлүк жумушчу күчүн тартуу жана колдонуу эрежелерин бузган 12 факт аныкталып, материалдар КЖБРге КРнын Жоруктар жөнүндө кодексинин 108-беренесине ылайык катталган.

0